في تفاصيل الأيام اللي بنعدي عليها بسرعه من غير ما ناخد بالنا بنلاقي إن في حقيقة كبيرة ما كانش لينا عين نشوفها إلا لما نتوجع ولما تخيب توقعاتنا ولما ناس كنا شايفينهم سما يطبقوا على صدرنا بالأرض ولما مواقف بسيطة تهز جواك جبل من المعاني اللي عمرك ما كنت هتفهمها من غير التجربة دي كلها ومع الوقت بنكتشف إن الحقيقة عمرها ما كانت بعيده الحقيقة كانت قدامنا بس إحنا اللي
كنا معلقين قلوبنا في أماكن غلط ومصدقين ضحكات مش لينا ومتمسكين بناس وجودهم عبء ومخبين وجعنا علشان نبان أقوى ونسكت صوت ضميرنا اللي كان بيلمح لنا إن الطريق ده مش طريقنا وإن العلاقة دي مش أمان وإن التمسك ده مش حب ده خوف من الفراغ لكن لما ييجي اليوم اللي تتجرد فيه من كل التوقعات من كل الوجع من كل التمسك الكاذب بنلاقي إن الحقيقة
ظهرت بشجاعة كأنها كانت مستنية اللحظة اللي نفتح فيها قلوبنا للفهم ونعترف إننا فضلنا نكذب على نفسنا كتير أكتر ما الناس كذبت علينا وإننا عاملنا نفسنا بقسوة أكتر من أي حد وإن اللي كنا بنطلبه من الآخرين كان واجب إننا نديه لنفسنا من زمان وفي ظل الحقيقة اللي اتكشف بنبدأ نشوف الأشخاص بشكل مختلف مش بالشكل اللي كانوا حابين يظهروا بيه لكن بالشكل اللي أفعالهم
فضحتهم بيه نشوف الكلمات اللي اعتبرناها وعود طلعت فقاقيع نشوف الاهتمام اللي صدقناه طلعت عادة مش حب نشوف الغياب اللي كنا بنبرره طلع أصلاً اختيار ونشوف وجود ناس في حياتنا ما كانش دعم كان استهلاك لوقتنا وطاقتنا وأمانا وبعد الفهم ده نلاقي نفسنا بنتقرب من اللي يستاهل وبنبعد من غير ندم عن اللي ما يعرفش قيمتنا ونكتشف إن الروح لما تتطهر من الناس الغلط
بتتنفس أريح وبتمشي بثقه أعلى وبترجع تعرف نفسها من جديد ونلاقي إن أكتر اللحظات اللي وجعتنا كانت هي اللي خلتنا ننتبه وأقسى التجارب كانت هي اللي فتحت عينينا على إننا نستحق أكتر بكتير من اللي كنا راضيين بيه ومع نضج الأيام نقتنع إن الحقيقة مهما وجعت فهي أرحم من الوهم وإن الوضوح مهما صدم فهو أنضف من التجميل وإن الصراحة مهما كسرت فهي أشرف من
المراوغة وإن ربنا ما بيكشفش لك حقيقة حد إلا لو كان خلاص مش مناسب لمكانه في حياتك وإن اللي اتكشف خلاص انتهى دوره واللي بان على حقيقته خلاص مش من حقه يرجع يلبس قناع تاني
بنفهم إن الحقيقة مش عدو الحقيقة منقذ وإن الوهم مش أمان الوهم فخ وإن الصدق مش ضعف الصدق قوة وإن اللي نكتشفه متأخر دايما بييجي في وقته علشان يعلمنا ما نضيعش وقت أكتر
وإن الطريق اللي قدامنا أنضف وأصفى وأهدى لما نتخفف من كل اللي كانت حقيقته غايبة عن عينينا وساعتها بس نعرف إن الحياة بعد الحقيقة أصدق والحب بعدها أنقى والروح بعدها أهدى وإن اللي جاي أجمل دايما لأننا مشيين له وإحنا فاهمين نفسنا وفاهمين مين يدخل حياتنا ومين ما يستحقش حتى يمر قدام بابها
