ظل ما بينا
بقلم/نشأت البسيوني
في لحظات كثيرة يحاول الانسان يفهم ليه بعض العلاقات تفضل عايشة جوانا حتى بعد ما تنتهي وليه في ناس نمشي من حياتهم لكن ما نعرفش نمسح أثرهم من قلوبنا كأنهم بيتركوا وراهم ظل ما بيتحركش ولا بيختفي مهما مر الوقت
ويبدأ الانسان يسأل نفسه هل كان التعلق خطأ ولا كانت المشاعر اكبر من قدرتنا على الفهم يمكن كنا بنصدق الوعود بسرعة يمكن كنا بنخاف نخسر حد افتكرناه أمان يمكن كنا محتاجين كلمة تطمننا في وقت كل الحاجات حوالينا كانت بتقع
ومع مرور الايام يكتشف الانسان ان بعض العلاقات ما كانش الهدف منها تكمل لكن كانت جايه في وقت معين علشان تغير فينا شيء معين تعلمنا نصبر اكتر نفهم نفسنا أكتر نعرف نتعامل مع الفقد ونقوم على رجلينا من غير ما نستنى حد يشيل وجعنا
ورغم كل ده يفضل جوا القلب مكان فاضي بينده على حاجات راحت وذكريات ما نعرفش نرتبها ولا نمسحها مكان اتعلقنا بيه بصدق واتأذينا منه بصدق بس ما زال جوانا جزء من الحكاية حتى لو ما بقاش ليها وجود في الواقع
ولما يهدأ الانسان شوية ويشوف الصورة من بعيد يفهم ان الظل اللي بينه وبين اللي راح مش ضعف ولا تعلق زيادة لكنه علامة ان القلب كان بيحب بصدق وان اللي اتقدم في العلاقة دي ما كانش قليل حتى لو النهاية ما كانتش زي ما كان بيتمنى
وفي يوم من الايام يعرف الانسان ان كل ظل بيختفي لما القلب يلاقي نوره الحقيقي نور يطمنه ويلم شتاته ويخليه يشوف نفسه من جديد من غير ما يفضل متعلق بحاجات خلاص ما بقاش ليها مكان في الحاضر
ساعتها يفهم ان اللي ضاع ما كانش نهاية واللي راح ما كانش قدره الوحيد وان الحياة ما زالت قادرة تعوضه وتديه بداية تمسح اثر كل ظل ما بينه وبين الماضي مهما طال الوقت ومهما اتأخر السلام جواه
