وشوش بتلبس الوقت
بقلم/ميرنا حسن
عالم الموضه مش بس هدوم او قماش او الوان عالم الموضه اكبر من كده بكتير عالم بيحرك الوقت ويديلك احساس انك ماشي مع دقات يومك او واقف قدامها من غير ما تحس عالم الموضه شكل من اشكال فهم الذات وطريقه لإعادة ترتيب حضور الانسان قدام الدنيا لأن كل قطعه بتتلبس مش مجرد ستره أو فستان دي لحظه بتقول للعالم أنا هنا بالشكل اللي انا اخترته مش اللي اتفرض عليا
الناس فاكره ان الموضه اهتمام زائد لكن الحقيقه انها اداه من ادوات التوازن النفسي لأنك لما تلبس حاجه شبهك بتحس إنك أخف كأن ثقل يومك وقع من على كتافك ولما اللبس يكون ضدك ضد مزاجك وضد روحك بتحس إن يومك ماشي غلط حتى لو ما حدش لاحظ ده غيرك اللبس مش غلاف للجسم بس ده غلاف لحاله كامله جواك بتتشكل واحدة واحدة
الموضه بتبدأ قبل ما تختار لون او مقاس بتبدأ من اللحظه اللي تفهم فيها انت مين النهارده مش مبارح ولا بكره لان كل انسان بيتغير وكل يوم له نسخه جديده من الملامح والافكار وكل نسخه محتاجه لبس يقدر يشيلها من غير ما يجرحها او يضغط عليها عشان كده الموضه مش اتباع عمياني لتيار ولا تقليد لحد ولا سباق في شاريه ايه لبسه ايه الموضه الحقيقيه هي إنك تلبس اللي يحافظ على روحك من غير ما يسرق ثقتك
كل تفصيله في اللبس بتغير حاجه صغيره جواك طريقه الكم الواسع بيرخي التوتر اللي على كتافك احيانا وطريقتك وانت بتربط الحزام بتخلي جسمك يشعر بضبط ما كان منفلت لون معين يعيد ترتيب مزاجك وخيط بسيط ممكن يرجعلك احساسك بنفسك بعد يوم طويل من الضغط الموضه هنا مش للناس الموضه ليك انت بس
وفي وسط الزحمه والخوف والسرعه بتدخل قطعه هدوم جديده مشهد يومك وتعيد توزيع الضوء من اول وجديد فستان بسيط يغير طريقتك في المشي جاكيت قديم يعيد ذكرياتك وينفض الغبار عن لحظه نسيتها لون جريء يخلي الدنيا ارحب واصدق
الموضه مش تجميل الشكل الموضه ترتيب للحضور ترتيب للطاقة اللي حوالين جسمك ترتيب لخطواتك وانت داخل يوم جديد وكأن اللبس بقى جسر بينك وبين نسخه أحسن منك نسخه فاهمه نفسها اكتر واحسن استعداد للحياة
وفي الاخر الموضه مش رفاهيه الموضه رساله صامته بتقولك كل يوم شكلك مش مجرد شكل شكلك جزء من قصتك اللي لسه بتتكتب بقلمك انت بس
