ارحمني يا دنيا عتقيني يا دنيا ادي تنزل مني وادي تنازل مني وادي العمر بيجري بيا وانا مش عايز منك حاجه غير انك تسيبيني في حالي وتفهمي اني مش ناقص وجع فوق الوجع ولا كسرة فوق الكسرة ولا امتحان بعد امتحان كأنك مصممه تعيشي عمري كله على حافة الانهيار ومش فاهمه ان السنين اللي راحوا مش هيرجعوا وان اللي ضاع مني مش هيتعوّض وان باقي عمري مش قد اللي فات وان اليوم اللي بيتاخد مني مستحيل يرجع ولا حتى يسيب وراه حاجه تتلم ادي تنازل مني بس مش ضعف لا ده استسلام حكيم من واحد تعب من كتر الوقوف وتعلم ان الصمود برضه ليه حدود وان مهما حاول اكون اقوى منك بتفضلي انتي صاحبة الكلمة اللي بتكسر وتسند وتبني وتهد من غير اعتبار لقلب ولا لروح ولا لذكرى
انا مش عايز حاجه يا دنيا غير راحه تهدي القلب اللي اتشقق من كتر ما حمل هموم مش بتاعته قلب حاول يفهمك ولما فهم اتوجع اكتر قلب كل ما يمد ايده للفرح يلاقيكي بتتجاهليه وكل ما يحاول يقوم ترفعي سقف الوجع بالعافية قلب حافظك من كتر ما دق فيكي ومشيت عليه برجلك مشي خذلان وخوف وامتحانات مابتخلصش ادي تنازل مني كل يوم والتاني وانتي حالفه تبكيني وتسيبي اثر في عيني مش عارف امسحه وتزودي الحمل على كتافي كأنك بتختبري صبري وتستني اللحظه اللي اقع فيها بس الغريب اني لسه واقف رغم كل حاجه رغم كل اللي ضاع رغم السنين اللي اتاكلت من عمري وانا ساكت ومكمل ومستني حاجه تشبه الراحه وما بتيجيش
يا دنيا شوفيلك حد تاني يا دنيا واعتقيني اعتقيني من دوامة الألم اللي بتسحبني فيها من غير ما اسأل ولا اعترض اعتقيني من الابواب اللي تفتحيها وقت ما افتكر اني لقيت الطريق وتطلع نهايتها اوسخ من بدايتها اعتقيني من الأسئلة اللي مالهاش ردود ومن البوادر اللي تتحول لخسائر ومن الناس اللي تدخل زي النسمة وتخرج زي العاصفه وتسيب خرابة اكبر من اللي لقوه اعتقيني من المحاولات اللي ما بتكملش من الاماني اللي ما بتتحققش من الخطوات اللي بترجعني لورا كل ما احاول اتقدم خطوة
سيبيني في حالي يمكن الاقي نفسي يمكن اعرف امسك طرف الهدوء اللي هرب مني يمكن الاقي مكان جوايا لسه ما اتعورش يمكن الاقي وجعي نفسه بيقوللي كفاية يمكن الاقي في السكوت صوت اعلى من كل الصراخ اللي مالي راسي يمكن الاقي في الوحدة حضن ارحم من حضن الدنيا يمكن الاقي حاجه تشبهنى يا دنيا غير التعب سيبيني يمكن اعرف اتنفس من غير خوف يمكن الاقي نفسي من غير ما ابص ورايا يمكن الاقي باب يتفتح لي من غير ما يوجعني
انا مش عايز حاجه يا دنيا لا كنوز ولا انتصارات ولا نجاحات اللي كنت عايزه كان اقل حاجه راحة بال يوم يعدي من غير ما تدوسي على حاجة جوايا ضحكه من القلب من غير ما تستني اللحظة اللي تطفيها دمعه تهدى من غير ما تزوديها نار بس انتي اخترتي الاسهل اخترتي تضغطي على نفس الحته كل مره لحد ما بقيت مش حاسس بيها واخدتيني من نفسي لدرجة اني بقيت غريب وسط يومي وغريب وسط قلبي وغريب حتى وسط الناس اللي بتحبني وادي تنازل مني بس تنازل مختلف تنازل لنفسي مش ليكي اني اكمل اني اقف اني ماستسلمش اني افضل ادور على حاجه حلوه حتى لو وسط الردم اني اصدق إن بعد الليل صبح حتى لو اتأخر اني اصدق إن القلب الموجوع ممكن يقوم وان الروح اللي اتبهدلت ممكن ترجع تتنفس وان الوجع مش نهايه وان الذل مش قدري وانكساري مش عنواني وان حقي راجع راجع حتى لو السنين اتأخرت
اعتقيني يا دنيا اعتقيني يمكن لما تسيبيني الاقيني يمكن لما ابعد عن دوامتك الاقي الطريق اللي يوديني لسلامي يمكن لما أقفل بابك افتح بابي يمكن الاقي لحظة حقيقية تشبهني يمكن الاقي صوتي الحقيقي اللي ضاع وسط زعيقك يمكن الاقي دمعه تهدى من غير ما تستني ذريعتها اعتقيني يا دنيا وخدي وجعك وسيبي الباقي ليا لاني خلاص اتوجعت كفاية واللي اتكسر جوايا مش ناقص كسر تانييا
