ثمن العودة

في لحظة ما بيكونش الإنسان راجع من مكان، بيكون راجع من نفسه راجع من معارك ما حدش شافها راجع من أيام اتسحبت من عمره وهو واقف مكانه راجع من هزائم كتمها جواه لحد ما صوته الداخلي بقى أضعف من إنه يشتكي ومع كل رجوع بيكتشف إن الثمن اللي دفعه علشان يفضل واقف كان أكبر بكتير من اللي كان متوقعه
في ناس بتفتكر إن الإنسان بيتغير لما يكسب لأ الإنسان بيتغير لما يتوجع لما يشوف الدنيا بوشها الحقيقي لما يعرف إن في ضهره مهما كان مليان ناس هم نفسهم أول حد هيقلبوا عليه أول ما يقع لما يفهم إن الطبطبة اللي مستنيها من البشر عمرها ما كانت ليه وإن اللي هيشيله ويقومه هو نفسه وبس
الرجوع الحقيقي ما بيكونش لبيتك ولا لذكرياتك الرجوع الحقيقي بيكون لروحك لما تضيع ولما تلف الدنيا كلها وتكتشف إن المكان اللي كنت بتدور عليه كان جواك مش براك وإن القوة اللي كنت مستني حد يديها لك أصلا كانت محبوسة جوا صدرك مستنية اللحظة اللي تطلع فيها وتبان
والحقيقة إن البني آدم لما يرجع من وجعه ما بيرجعش زي ما كان لأ بيرجع أهدى وأعمق وأقوى بيرجع فاهم قيمته وفاهم عدوه الحقيقي وفاهم مين يستحق يدخل حياته ومين ما يستهلش ياخد دقيقة من وقته بيرجع وهو شايل جواه صمت أكبر من الكلام وحكايات محدش يعرفها غير ربنا
والأصعب من الرحلة ذاتها هو إنك ترجع وتتعامل مع الناس اللي كانت بتبصلك وانت بتقع وما مدتلكش إيد حتى كلمة ما قالوهاش حتى سؤال ما سألوهوش حتى قلق بسيط ما بانش في عيونهم ساعتها بس تعرف إنك كنت لوحدك طول الطريق وإنك لو وقعت تاني مش هتلاقي حد غيرك يشيلك
لكن مع كل ده الإنسان لما يرجع ويقف من تاني يكتشف إن الوقفة دي مش عادية الوقفة دي إعلان انتصار هادي إعلان إن لسه جواه روح ما ماتتش وإن كل وجع فات علمه وإن كل خيبة مرّت صقلته وإن كل حد باعه زوّده قوة وإن كل باب اتقفل قدّامه فتح له باب أكبر بس في وقته
وتبدأ تشوف العالم بنظرة مختلفة تشوف إن السلام أغلى من كل حاجة وإن نفسك أولى بالحب وإن قلبك ما ينفعش يتسلم لأي حد وإن التعب مش ضعف وإن الرجوع مش انهزام الرجوع أحيانًا بطولة لأنك رجعت بعد ما الدنيا كلها كانت عايزاك ما تقومش
الإنسان الحقيقي مش اللي عمره ما وقع الإنسان الحقيقي هو اللي وقع واتوجع وانكسر واتخلى عنه كل اللي اتسند عليهم وبرغم ده كله رجع لنفسه ورجع للحياة ورجع لطريقه وهو شايل فوق كتفه معنى اسمه ثمن العودة