مسافة
بقلم/نشأت البسيوني
في وقت ما تدرك إنك محتاج مسافة مسافة بينك وبين كل شيء أصبح يستهلكك بينك وبين الضوضاء اللي ما كانتش سايبالك فرصة تسمع نفسك بينك وبين الناس اللي كانوا قريبين زيادة لدرجة إنك نسيت حدودك ونسيت احتياجك ونسيت أنت مين وسط كل ده.
وتبدأ تحس إن المسافة مش هروب لكن تنفس وإنك محتاج تبعد علشان تشوف الصورة كاملة لأن القرب الزيادة ساعات يعميك يخليك تشوف الناس أكبر من حجمهم ويخليك تشوف نفسك أصغر من قيمتها
وتسأل نفسك ليه فضلت وقت طويل محشور في دوائر ما بتكبرش ليه كنت بتجري ورا رضا ناس مش شايفينك ليه كنت بتحط قلبك في أماكن ما استحملتش وجوده ليه كنت بتضغط على روحك علشان ما تزعلش حد غيرك
ومع أول خطوة تبتعد فيها تحس بخفة غريبة تحس إن صوتك بقى أوضح وإن مشاعرك بدأت ترتب نفسها وإن الأفكار اللي كانت متكدسة بقت تسري بحرية وإنك لأول مرة من مدة طويلة قادر تفرق بين اللي يليق بيك واللي يقلل منك
وتفهم إن المسافة أحيانًا علاج إنها بتخليك ترجع تتعرف على نفسك اللي ضاعت وسط الزحمة إنها بتخليك تقيم علاقاتك بصدق من غير خوف ومن غير مجاملات إنها بتخليك تواجه حقيقة إن مش كل حد قريب هو أمان وإن مش كل تعلق حب
وتبدأ تلاحظ إن الأيام بقت أنضج وإن اختياراتك بقت أهدى وإنك ما عدتش بتقبل الفتات ولا بتتعلق بالنصف ولا بترضى بالنقص وإنك بقيت تدرك قيمتك من غير ما حد يقول ومن غير ما تستنى حد يثبت
الرحلة تكتشف إن المسافة ما كانتش علشان تبعد عن الناس لكنها كانت علشان تقرب من نفسك وإن البعد ما كانش خسارة لكنه استعادة وإنك لما وقفت بعيد شوية قدرت تشوف بوضوح إن الحياة أوسع من كل اللي ضيقوك
