خطوات لا ترى
بقلم/ناني عادل
في حياة كل واحد فينا فيه خطوات ما حدش شافها ولا سمع صوتها لكنها كانت الأهم كانت السبب في إن الإنسان يوصل لمكانه دلوقتي كانت خطوات صامتة خطوات جوا الروح مش على الأرض خطوات أخدت من العمر وقت ومن القلب قوة ومن العقل حيرة لكنها فضلت موجودة تبني وتغير وتعدّل من غير ما حد ياخد باله
خطوات لا ترى هي اللحظات اللي الإنسان وقف فيها لوحده يفكر وهو مش قادر يحكي لحد هي الليلة اللي ما نامش فيها وهو بيدوّر على معنى لفوضى الأيام هي السكة اللي كانت فاضية لكنه مشيها علشان يعرف نفسه أكتر هي القرار اللي أخده وهو خايف لكنه أخذ خطوة لقدام
الخطوات اللي ما تتشافش هي اللي شكلت الوعي خلت الإنسان أقوى من غير ما يتظاهر بالشجاعة خلت قلبه أهدى وعقله أنضج وخطواته أعمق خلت نظرته للناس أوضح خلت اختياراته أصدق خلت وجوده أثقل من قبل خلت حياته مش مجرد مرور خلت يومه ليه معنى
وكل خطوة ما حدش شافها كانت دليل إنه ما كانش محتاج تصفيق ولا احتفال ولا حتى كلمة تقدير كان محتاج نفسه بس محتاج يقف من غير سند ويكمل من غير خوف ويختار من غير ما حد يوجهه ويبعد من غير ما يندم ويقرب من غير ما يتردد
ومع مرور الوقت الإنسان يكتشف إن الخطوات اللي الناس شافتها كانت مجرد ظاهر وإن اللي غيّره فعلاً واللي بناه واللي طوره واللي عمل منه نسخة أقوى كانت خطوات خفيّة محدش عرف إنها موجودة غيره
خطوات لا ترى مش ضعف ولا هروب هي القوة اللي ما بتتقالش هي اللحظة اللي الإنسان يواجه نفسه بصدق هي الطريق اللي يبني روحه مش شكله هي العلامة اللي تثبت إن كل بداية كبيرة بدأت من خطوة محدش شافها ولا حس بيها لكن كانت أقوى من أي خطوة ظاهرة
