اعداد وتقديم:الإعلامية منار شريف سعيد
كلية الصحافة والإعلام – قسم الإذاعة والتلفزيون
ليه بقينا بنعامل بعض كأننا محطة مؤقتة؟.. فين راحت العِشرة والوفا؟
ليه بقينا في وقت من الأوقات بنعامل بعض كأن الأشخاص مجرد مرحلة؟
شخص يدخل حياتنا، نعيش معاه تفاصيل، نشاركه أيام حلوة ووحشة، نسمعه ونقف جنبه ويقف جنبنا…
وبمجرد ما يحصل خلاف، أو تظهر ناس جديدة في حياتنا، نقدر بكل سهولة ننسى كل اللي فات.
فين راحت العِشرة؟
وفين مبدأ «ده شخص أنا عشرته… مينفعش أكون سبب في أذيته»؟
العِشرة مش مجرد سنين عدت.
العِشرة مواقف، وذكريات، وأسرار، وأوقات كان فيها شخص موجود لما غيره كان غايب.
وعشان كده، حتى لو العلاقة انتهت، مش لازم كل حاجة حلوة حصلت بينكم تنتهي معاها.
ممكن تختلف مع شخص…
ممكن تبعد عنه…
وممكن حتى تكتشف إن استمرار العلاقة مش مناسب ليك.
لكن ده مش معناه إنك تغدر بيه، أو تفضح أسراره، أو تنكر وقفته معاك، أو تتعامل معاه كأنه ماكانش يومًا جزء من حياتك.
الاختلاف مش بيمسح العِشرة.
وأحيانًا أكتر حاجة بتوجع مش إن الشخص يمشي…
لكن إنه بعد ما يمشي، يتصرف كأنك ماكنتش موجود أصلًا.
كأن كل المواقف اللي بينكم ماكانتش مهمة.
كأن الثقة اللي اديتهاله ماكانتش لها قيمة.
وده بيخلينا نسأل:
هل بقينا بنحب الأشخاص فعلًا؟
ولا بقينا بنحب وجودهم طول ما هم مناسبين لينا؟
هل بقينا بنحافظ على الناس؟
ولا أول ما نلاقي بديل أسهل، بننسى اللي كان موجود قبل كده؟
الحياة بتتغير، والناس بتتغير، والعلاقات أحيانًا بتنتهي…
وده طبيعي.
لكن اللي مش طبيعي إن نهاية العلاقة تتحول إلى مبرر للأذى.
لو شخص كان يومًا قريب منك، فحتى لو اختلفتوا، خليك فاكر إن كان بينكم وقت ومواقف.
ولو شخص ائتمنك على سر، خليه يفضل سر حتى بعد ما تفرقوا.
ولو شخص وقف جنبك في وقت صعب، متخليش خلاف واحد يخليك تنكر فضله.
لأن الوفاء الحقيقي مش إنك تفضل مع الشخص للأبد…
الوفاء إنك حتى لما تمشي، ماتأذيش.
وفي النهاية، يمكن إحنا محتاجين نرجع نفتكر إن الناس مش أشياء بنستبدلها.
كل شخص بيدخل حياتنا بيسيب أثر.
ويمكن مش كل شخص هنكمل معاه للنهاية، لكن ده مش معناه إننا نرمي العِشرة في أول خلاف.
اختار تبعد لو لازم…
لكن ابعد بأصل.
لأن الأيام بتتغير، والأشخاص بتتغير، والعلاقات بتتغير…
لكن أصل الإنسان هو الحاجة اللي بتفضل.
أنا الإعلامية منار شريف سعيد…
وسؤالي ليكم:
لما العلاقة تنتهي…
هل لازم العِشرة تنتهي معاها؟
ولا المفروض يفضل للعيش والملح والسنين مكان… حتى لو كل واحد اختار طريق؟
