نقطة تحول
بقلم/نشأت البسيوني
في لحظة معينة من العمر نلاقي نفسنا واقفين قدام مرآة مش بتعكس ملامحنا بس لكنها بتكشف اللي كنا نهرب منه سنين مرآة بتورينا تعبنا اللي خبيناه وقراراتنا اللي ما واجهناش نتيجتها واحلامنا اللي اتأجلت لحد ما بقت شبه ذكرى بعيدة وكأن الحياة وقفت تقول لنا كفاية لازم نغير الاتجاه نقطة التحول عمرها ما بتيجي مع ضوضاء ولا علامات واضحة هي بتيجي في صمت
خفيف ماحدش بياخد باله منه غير قلبك يمكن ييجي من وجع كبير يمكن من كلمة كسرت حاجة جواك يمكن من لحظة صدق واجهت نفسك فيها من غير ما تبرر ومن غير ما تدافع يمكن من اكتشاف بسيط انك عشت زمن طويل ترضي غيرك وتنسى نفسك وتبدأ تستوعب انك كنت بتجري في طريق ما هوش طريقك وان الخطوات اللي تعبتك كانت ماشية ناحية باب مقفول وان كل اللي
فات ما كانش خسارة بالعكس كان تمهيد عشان تعرف مين انت بجد وتعرف ايه اللي يستاهل وايه اللي لازم يتشال من حياتك بهدوء من غير غضب ومن غير ندم نقطة التحول الحقيقية هي اللحظة اللي قلبك يقرر فيها انه مش هيسمح لحد يقلل منه ولا لظرف يكسره ولا لزمن يسرق جماله هي اللحظة اللي تختار فيها نفسك مش انانية لكن احترام لروحك اللي تعبت واللي استحقت تتشاف
وتتقدر وتتسمع وتبدأ تغير كل حاجة بهدوء تغير طريقة كلامك طريقة تفكيرك طريقة وجودك تغير علاقات ما رجعتش تديك امان تغير عادات سحبتك لورا تغير خوف قديم كان معطل خطواتك وتلاقي انك بتتنفس من جديد كأنك كنت عايش بنص روح وجالك النص التاني اللي كان ناقصك تفهم ان نقطة التحول ما هيش حدث كبير ده قرار داخلي بسيط جدا لكنه قوي جدا قرار يقول كفاية اللي فات ما يشبهنيش واللي جاي هو النسخة الافضل مني
