الناس اللي بتعيش بمبدأ ما اخسرش نفسي علشان اكسب حد
بقلم/نشأت البسيوني
في ناس وصلت لمرحله مش بتسمح فيها لاي حد يخسرهم نفسهم مش بقت تهتم مين يرضى ومين يزعل ولا بقت تجري ورا حد ولا بقت تستحمل وجود مؤذي ولا علاقة ناقصه ولا كلام نص نص ولا اهتمام يوم ويومين وتاني يوم غياب
الناس دي اتعلمت بالطريق الصعب اتعلمت بعد سقوط ورا سقوط وبعد علاقات ما كانتش قد النقاء اللي جوه قلبهم وبعد مواقف علمتهم ان اللي ما يعرفش قيمتك من الاول مش هيعرفها مهما شرحت ومهما تعبت ومهما قربت
بقوا يعرفوا ان في حاجات لو خسروها تتعوض لكن لو خسروا نفسهم ما تتعوضش وفي ناس وجودها مكسب وفي ناس وجودها حمل وفي ناس لازم تخرج علشان النفس تتنفس والقلب يعرف يرجع ينبض من جديد
الناس اللي عايشه بالمبدأ ده مش قاسيه ولا متكبره هي بس ناس وعيت بدري ناس عرفت ان كرامتها ما تتجزأ وان مشاعرها مش لعبه وان قلبها مش محطة انتظار حد يقرر يرجع امتى ويمشي امتى وعرفت كمان ان اللي يحب بجد ما يوجعش واللي ينوي يكمل ما يرحلش فجأه
بقوا يختاروا نفسهم حتى لو اتقال عليهم تغيروا وحتى لو اتوصفوا انهم بقوا باردين وحتى لو ناس كانت قريبه فهمتهم غلط لانهم خلاص اتعلموا ان الحياة مش سباق ارضاء وان اهم علاقه في الدنيا علاقتك بنفسك
تلاقيهم بطلوا يشرحوا بطلوا يدافعوا عن نفسهم بطلوا يثبتوا نواياهم لحد بطلوا يسمعوا كلام يخفض قيمتهم بطلوا يتمسكوا بناس ما تستاهلش وبقوا ينسحبوا من غير صوت ومن غير ما يلوموا حد
ومع الوقت يعرفوا ان اللي يمشي من حياتهم مش خساره وان اللي يضيع مش مكتوب يكمل وان اللي ما قدرهمش النهارده كان هيكسرهم بكره وان ربنا دايما بيشيل من طريقهم ناس مش خير ليهم حتى لو هم كانوا شايفين العكس
الناس اللي بتعيش بمبدأ ما اخسرش نفسي علشان اكسب حد هما اكثر ناس ترتاح اكثر ناس هاديين اكثر ناس علاقتهم بنفسهم صلبه لانهم اختاروا الطريق اللي فيه كرامتهم فوق كل علاقه وروحهم اغلى من اي شخص
دول ناس فاهمه ان اللي يستحقهم هيظهر واللي ما يستحقش هيمشي وانهم مش محتاجين يثبتوا نفسهم لحد غير رب العالمين اللي شايف كل شيء
